ဧရာဝတီရဲ့ အသံလွတ်လပ်မှု သင်္ကေတတွေပျံ့လွင့်လာမှုအပြီး
မြို့တွေ တစ်မြို့ဝင်၊ တစ်မြို့ထွက်
ခွပ်ဒေါင်းဟာ မမောမပန်း ပျံသန်းနေခဲ့တယ်။
ဧရာဝတီဟာ ငါတို့အားလုံးရဲ့ နှလုံးသား
အမေဟာ ဧရာဝတီကို ရဲရဲဝံ့ဝံ့ ကူးခတ်တယ်
ဧရာဝတီဟာ လွတ်လွတ်လပ်လပ် စီးဆင်းနေခဲ့တယ်။
““ မနက်လေးနာရီကထဲက လမ်းလျှောက်လာတယ်
တချို့က ဧရာဝတီတိုင်းအ၀င်က သွားစောင့်တယ် ””
ဒေါင်းအလံတွေ လေမှာဝဲလွင့်နေတဲ့ မနက်ခင်းဟာ နှင်းဆီရောင်သန်းနေခဲ့တယ်
အတီးမျိုးစုံတီးမှုတ်၊ ကကြိုးစုံတဲ့ ကကွက်တွေနဲ့ အမေ့ကို ကြိုဆိုခဲ့တယ်
မမောမပန်းနဲ့ အမေဟာ ဧရာဝတီကို ကူးခတ်နေခဲ့တယ်။
““ အမေ့ကို မတွေ့တာ နှစ်နှစ်ဆယ်ရှိပြီ
နိုင်ငံကောင်းအောင်လုပ်ဖို့၊ လမ်းညွှန်ချက်တွေခံယူဖို့ လာစောင့်နေတာ
စကားပြောဖို့ စင်မြင့်တစ်ခုလည်း လုပ်ထားတယ် ””
ရင်ထဲက လျှံကျလာတဲ့ စကားလုံးတွေဟာ ဟန်ဆောင်မှုကင်းမဲ့လို့
အတိတ်တစေ်္ဆရဲ့ ခြောက်လှန့်မှုတွေ ကင်းစင်နေခဲ့တယ်။
““ သမီးတို့ရဲ့ ဆန်္ဒကိုပြချင်လို့ လာစောင့်နေတာ
ကျောင်းမှာ လက်တွေ့လုပ်ငန်းတွေ မရှိဘူး
ပုံနှိပ်စာအုပ် အခက်အခဲရှိတယ်
သမီးတို့ကျောင်းတွေကို ပစ်မထားပါနဲ့လို့ ပြောချင်လို့ပါ ””
လိုအပ်ချက်တွေ တောင်းခံချင်တဲ့ ကျောင်းသူတစ်ဦးရဲ့အသံဟာ
အမှန်တရားကို မီးမောင်းထိုးပြလိုက်ခြင်းပဲပေါ့။
ဧရာဝတီရဲ့ အသံဟာ တိမ်ပြိုသလို တအိအိနဲ့ ပြိုဆင်းလာခဲ့တယ်
““ အမေဟာ အမှန်တရားကို မြတ်နိုးလို့ အရမ်းချစ်တယ်
တွေ့လည်းတွေ့ဖူးချင်လို့ လာတွေ့တာ၊ တစ်နှစ်ကျလည်း အကျခံမယ် ””
ကျောင်းသားတစ်ယောက်ရဲ့ အသံဟာ ရင်ထဲကို ဆို့ဆို့နင့်နင့်
သာပေါင်း၊ ငပုတော၊ အိမ်မဲစတဲ့ ဧရာဝတီတွေဟာ
စက်လှေတွေ၊ သင်္ဘောတွေ၊ မော်တော်ကားတွေပေါ်အပြည့်
သူတို့လည်း မမောမပန်း ခရီးနှင်ခဲ့ကြတယ်။
““ ကျွန်တော်ဖျားနေတာ (၁၅)ရက်လောက်ရှိပြီ၊ ဆေးထိုးရတယ်
အခုတောင် တွေ့ချင်လွန်းလို့ ကုန်းရုန်းထလာတာ ””
ဖျားနာနေသူရဲ့ အသံဟာ အားမာန်အပြည့်နဲ့
ကမ်္ဘာမကြေ သီချင်းသံကလည်း တစ်ချက်တစ်ချက် ထိုးထွက်နေခဲ့တယ်
လူဦးရေ တစ်သိန်းဝန်းကျင်ရဲ့ရှေ့မှောက် ခွပ်ဒေါင်းရဲ့ တောင်ပံခပ်သံတွေ
တွန်ကြူးသံတွေဟာ ကိုးသိန်းအားကစားကွင်းတစ်လုံး ဖုံးလွှမ်းသွားခဲ့ပေါ့
““ လှိုက်လှိုက်လှဲလှဲ၊ ပြုံးပြုံးရွှင်ရွှင်၊ တက်တက်ကြွကြွနဲ့ ကြိုဆိုခဲ့တာ ကျေးဇူးတင်တယ်
ဒီလိုပြည်သူတွေနဲ့ဆိုရင် သာယာတဲ့ပြည်ထောင်စုကြီး တကယ်ပဲဆောက်တည်နိုင်မယ်လို့
ယုံကြည်တယ်၊ ရွေးကောက်ပွဲဆိုတာ ခဏခဏဖြစ်တာမဟုတ်ဘူး၊ ပုံမှန်လွတ်လွတ်လပ်လပ်
မျှမျှတတ ရွေးကောက်ပွဲဖြစ်နိုင်ဖို့ ၀ိုင်းပြီးကြိုးစားမယ် ””
အားမာန်အပြည့်နဲ့ ခွပ်ဒေါင်းရဲ့တောင်ပံတွေ တဖြတ်ဖြတ်ခတ်လို့။
““ ၀မ်းသာတယ်၊ ဒါပေမယ့် ၀မ်းနည်းတယ်၊ အမေ အသက်ရသွားပြီ
ဒါကို ၀မ်းနည်းမိတာပါ ””
ရင်ထဲစူးနစ်သွားတဲ့ စကားနဲ့ ဧရာဝတီရဲ့ အသံဟာ ဆို့နင့်ကြေကွဲလို့။
မောင်မင်းစိုး
ဝန်ခံချက်။ ။ ဆဲဗင်းဒေးဂျာနယ် ““ဒေါ်အောင်ဆန်းစုကြည်၏ ပုသိမ်နှင့်မြောင်းမြခရီးစဉ် ””
သတင်းအား ကဗျာအဖြစ်ခံစားရေးဖွဲ့ထားခြင်း ဖြစ်ပါသည်။
