ဒီတော့ တစ်ဦးကောင်းတစ်ယောက်ကောင်းကို မျှော်လင့်နေမယ့်အစား အားလုံးစုစည်းမှုနဲ့ ခရီးဆက်နိုင်မယ်ဆိုရင်တော့ အချိန်တိုတိုအတွင်းမှာပဲ အောင်မြင်မှုသရဖူကို ဆောင်းနိုင်ပါလိမ့်မယ်။ မိမိတို့အနေနဲ့ကတော့ ဒီမိုကရေစီခေါင်းဆောင်အဖြစ် သတ်မှတ်ထားတဲ့ ဒေါ်အောင်ဆန်းစုကြည်ကို များစွာမျှော်လင့်နေခဲ့ကြပါတယ်။ မှန်ပါတယ်။ သူဟာ မြန်မာနိုင်ငံအတွက်တော့ ကယ်တင်ရှင်တစ်ဦးလိုပါပဲ။ ဒါပေမယ့် နေရာတိုင်းမှာတော့ သူ့ကိုချည်းအားကိုးနေလို့တော့ မဖြစ်ပါဘူး။ ကိုယ်တိုင်ပါဝင်ဆောင်ရွက် တဲ့နည်းနဲ့ ရှေ့ဆက်ပြီး မနက်ဖြန်များစွာကို ကျော်ဖြတ်နိုင်ဖို့ လိုအပ်ပါလိမ့်မယ်။
ဥပမာ-အောင်မြင်တဲ့ ဘောလုံးအသင်းတစ်ခုလိုပါပဲ။ ဂိုးသမားဟာလည်း သူ့ရရှိထားတဲ့ ဂိုးတိုင်နှစ်ခုကြားကနေ တစ်ဖက် တိုက်စစ်မှူးသွင်းတဲ့ ဂိုးတွေမဝင်အောင် တာဝန်ယူပြီး အစွမ်းကုန် ကာကွယ်ရသလို၊ နောက်တန်း ခံစစ်မှူးတွေကလည်း တစ်ဖက် တိုက်စစ်မှူးများရဲ့ မိမိတို့ကို ကျော်လွှားပြီး ဂိုးသွင်းမှုများမပြုလုပ်နိုင်အောင် နောက်တန်းကနေ အုတ်တံတိုင်းသဖွယ် ခုခံကြရမှာ ဖြစ်ပါတယ်။ အလယ်တန်းသမားများအနေနဲ့လည်း မိမိတို့ထံရောက်ရှိလာတဲ့ ဘောလုံးကို အပြိုင်အဆိုင်ဆိုသလို တစ်ဖက်အသင်း ကို ဂိုးရရှိအောင်ဖန်းတီးကြမယ့် ရှေ့တန်းပလေယာတွေဆီကို သန့်သန့်ရှင်းရှင်း သပ်သပ်ရပ်ရပ်နဲ့ အချိတ်အဆက်မိမိအနေအထားနဲ့ ပို့ဆောင်ပေးနိုင်ရပါမယ်။ အဲဒီလိုပါပဲ ရှေ့တန်းတိုက်စစ်သမားတွေကလည်း မိမိတို့ထံရောက်ရှိလာတဲ့ ဘောလုံးကို လှလှပပအစွမ်းပြ ကာ တစ်ဖက်အသင်းရဲ့ နောက်တန်း ခံစစ်သမားတွေကို လိမ်ခေါက်သင့်လိမ်ခေါက်ပြီး ဂိုးရရှိဖို့ စွမ်းဆောင်ကြရမှာဖြစ်ပါတယ်။ ဒါမှသာလျှင် အောင်မြင်တဲ့ အသင်းတစ်ခုဖြစ်လာမှာဖြစ်ပါတယ်။ ဒီလိုပါပဲ မိမိတို့အနေနဲ့ ဘယ်လိုနေရာမှာမဆို ဘယ်သူတွေ ဘာမလုပ်လို့ဆိုပြီး အပြစ်တင်နေမယ့်အစား ကိုယ်တိုင်သန့်ရှင်းသပ်ရပ်တဲ့ ပလေယာအဖြစ်နဲ့ ပူးပေါင်းပါဝင်ဆောင်ရွက်ကြမယ်ဆို ရင်တော့ အသင်းပဲဖြစ်ဖြစ်၊ အဖွဲ့အစည်းတစ်ခုပဲဖြစ်ဖြစ်၊ တိုင်းပြည်တစ်ခုပဲဖြစ်ဖြစ် အောင်မြင်တဲ့သရဖူကို မဝေးတော့တဲ့ အနာဂတ် မှာ ဖန်တီးပုံဖော်နိုင်ကြမှာ ဖြစ်ပါတယ်။
ဒီလိုအသင်းသမားစုစုစည်းစည်း စည်းလုံးညီညွတ်မှုမျိုးနဲ့ လူတိုင်းကိုယ့်ကျရာနေရာမှာလေးမှာ မခိုမကပ်ဘဲ ပါဝင်ကြမယ် ဆိုရင်တော့ ဒီမိုကရေစီခရီးကြမ်းဟာ အခက်အခဲမျိုးစုံကနေ စွမ်းအားရှိရှိနဲ့ အမြန်ဆုံးအကောင်အထည် ပေါ်လာလိမ့်မယ်လို့ ယုံကြည်ပါတယ်။ ဒါကဘာကြောင့် ပြောရတာလဲဆိုတော့ လုပ်နိုင်တဲ့သူတွေအနေနဲ့ သူ့နေရာနဲ့သူ လုပ်ဆောင်နေကြပေမယ့် အားမလို အားမရဖြစ်ပြီး ဘယ်သူမလုပ်လို့၊ ဘယ်ဝါမလုပ်လို့ဆိုပြီး အပြစ်တင်တဲ့အသံလေးတွေ ကြားနေရလို့ပဲဖြစ်ဖြစ်။ ဒီတော့ အားလုံး ကူညီဖြေရှင်းပြီး ဝိုင်းဝန်းကာ ဖြစ်ပေါ်လာတဲ့ကိစ္စလေးတွေကို ကူညီပံ့ပိုးတဲ့အနေနဲ့ တာဝန်ယူစိတ်နဲ့ ဖြေရှင်းသွားကြဖို့ လိုအပ်နေပါတယ်။
နှစ်ပေါင်းနှစ်ထောင့်ငါးရာကျော် ခန့်ခန့်ထည်ထည်အဖြစ် ယိုးယွင်းမှုနည်းပါးစွာနဲ့ အောင်မြင်စွာခရီးဆက်နေတဲ့ ဗုဒ္ဓတည်ထောင် ထားခဲ့တဲ့ သာသနာတော်ဆိုတဲ့ အသင်းကြီးဟာလည်း တကယ်တန်းအနေနဲ့ သုံးသပ်မယ်ဆိုရင် ဗုဒ္ဓဆိုတဲ့တစ်ဦးကောင်း တစ်ယောက် ကောင်းကြောင့်သော မဟုတ်တာသေချာပါတယ်။ ဒါကို တာဝန်သိစိတ်နဲ့ လက်ဆင့်ကမ်းသယ်ဆောင်တော်မူခဲ့တဲ့ မထေရ်များစွာရဲ့ ကြိုးပမ်းမှုကြောင့် ဖြစ်ပါတယ်။ ဒီနေရာမှာ တစ်ချက်ပြည်ဆန်းစစ်ကြည့်မယ်ဆိုရင် ဗုဒ္ဓအနေနဲ့ သူကိုယ်တိုင်တည်ထောင်ထားတဲ့ သာသနာတော်ကြီးကို လွယ်လွယ်ကူကူနဲ့ တည်ထောင်ခဲ့တာမဟုတ်ပါဘူး။ အခက်အခဲမျိုးစုံ၊ အတိုက်အခံမျိုးစုံကို ကြုံတွေ့ခဲ့ရတာ ပဲဖြစ်ပါတယ်။ ဒါပေမယ့် လေးအသင်္ချေနဲ့ ကမ္ဘာတစ်သိန်း ကာလပတ်လုံး ခန္တီပါရမီ၊ မေတ္တာပါရမီစတဲ့ ပါရမီတော်များကို ဖြည့်ဆည်းတော်မူခဲ့ကြောင့် ဒီအခက်အခဲ၊ အတိုက်အခံမျိုးစုံကိုတော့ တွန်းလှန်တော်မူခဲ့နိုင်ပါတယ်။ ဒီနေရာမှာ တွန်းလှန်တော်မူ ခဲ့တယ်ဆိုတာ ဒုက်တွေ၊ ဓားတွေ၊ လက်နက်မျိုးစုံစတာတွေနဲ့ ပြန်လည်ခုခံခဲ့တာမဟုတ်ပါဘူး။ ဖြစ်သင့်ဖြစ်ထိုက်တာတွေကို နူးနူးညံ့ညံ့ သိမ်သိမ်မွေ့မွေ့နဲ့ ဖြေရှင်းတော်မူခဲ့ခြင်းဖြစ်ပါတယ်။
နောက်တဆင့်တက်ပြီး စဉ်းစားကြည့်မယ်ဆိုရင် ဗုဒ္ဓလို အတုမရှိဘဲ မဟုတ်တာ၊ မမှန်တာမျိုးတွေကို မြူမှုန်မျှပင် မလုပ်တဲ့ ပုဂ္ဂိုလ်မျိုးကိုတောင် ဒေဝဒတ်လို ယောက်ဖလည်းတော်၊ ညီတစ်ဝမ်းကွဲလည်းတော်တဲ့ လူမျိုးတွေရဲ့ အတိုက်အခံမျိုးစုံ၊ စိဉ္စာမာနလို့ မိန်းမမာယာအမျိုးမျိုးနဲ့ မသင့်တော်လှတဲ့၊ မလျောက်ပတ်လှတဲ့ စွပ်စွဲမှုအဖုံဖုံ၊ မိစ္ဆာဒိဋ္ဌိအယူရှိတဲ့ ပုရာဏကဿပစတဲ့ တိတ္ထိဆရာ ကြီးများရဲ့ တပည့်မျိုးစုံရဲ့ လာဘ်လာဘအတွက် အဆဲအရေးမျိုးစုံနဲ့စတဲ့ ဆူးညောင့်ခလုတ်များစွာဟာ တန်းစီပြီး ကာဆီးနေခဲ့ ပါတယ်။ ဒါပေမယ့် မိမိမှန်ကန်တဲ့ လမ်းကြောင်းကိုတော့ နည်းနည်းမှ တွန့်ဆုတ်သွားခြင်းမျိုး မပြုလုပ်တော်မူခဲ့ဘဲ ယခုလို အရှည်ခန့် တည်တန့်နေခဲ့တဲ့ သာသနာတော်ကြီးကို အကောင်းအမွန်ဆုံး ပုံဖော်ထုဆစ်နိုင်ခဲ့တာ ဖြစ်ပါတယ်။ ဒါပေမယ့် ခုနက ပြောသလိုပါပဲ ယခုလိုအရှည်တည်တန့်နေတာဟာ ဗုဒ္ဓဆိုတဲ့အတုမရှိတဲ့ ပုဂ္ဂိုလ်တစ်ဦးရဲ့ ကြိုးစားမှုကြောင့်တော့ မဟုတ်ဘူးဆိုတာ ပါပဲ။ ဒါကြောင့် မိမိတို့အနေနဲ့လည်း ဒီမိုကရေစီခရီးကြီးကို မောင်းနှင်နေတဲ့အခါကာလမှာ ကိုယ်စွမ်းဆောင်နိုင်တဲ့ နေရာအသီးသီး ကနေ ပါဝင်ဆောင်ရွက်နိုင်ဖို့ များစွာပဲလိုအပ်ပါတယ်။ ဒီနေရာလေးမှာလည်း ကြုံတုန်းအဖြစ်အပျက်လေး တစ်ခုလောက်တော့ ပြောပြချင်ပါသေးတယ်။ ဇင်ဝါဒအဖြစ်အပျက်လေး တစ်ခုပေါ့။
မြင့်မားတဲ့ တောင်ထိပ်တစ်ခုပေါ်မှာ ကျိုတိုမြို့ ဇင်ဥယျာဉ်တစ်ခုရှိတယ်။ ဥယျာဉ်တစ်ခုလုံး သဲတွေ ခင်းထားပြီး ကျောက်တုံး ၁၅တုံးလည်း ရှိတယ်။ မူလကတော့ ဒီဥယျာဉ်မှာရှိတာ ကျောက်တုံး ၁၆တုံးတဲ့။ ဖြစ်ပုံက ဒီလိုပါ။ ဒီ ဥယျာဉ်ကို တည်ဆောက်တဲ့ ဥယျာဉ်မှူးဟာ ဥယျာဉ်တည်ဆောက်ပြီးစီးတဲ့အခါကျတော့ ဧကရာဇ်မင်းကို မိတ်ခေါ်ပြတယ်တဲ့။ ဥယျာဉ်ကို ကြည့်ပြီး ဘုရင်က ပြောတယ်။
''တကယ့်ကို အံ့ချီးဖယ်ပါပဲ။ ဂျပန်နိုင်ငံမှာရှိတဲ့ ဥယျာဉ်တွေထဲမှာတော့ စွဲမက်စရာအကောင်းဆုံး ဥယျာဉ်ပါပဲ။ ပြီးတော့ ဥယျာဉ်တစ်ခုလုံးမှာ အလှဆုံးအရာကတော့ ဒီကျောက်တုံးပဲ''
အဲဒီစကားလည်း ကြားရောဧကရာဇ်မင်း ချီးမွမ်းလို့ မဆုံးခင်မှာ ဥယျာဉ်မှူးဟာ ဘုရင်ပြောတဲ့ အလှဆုံးဆိုတဲ့ ကျောက်တုံးကို ယူပြီး အဝေးကို လွှင့်ပစ်လိုက်တယ်။ ပြီးတော့ ပြောတယ်။
''အင်း၊ အခုမှပဲ ဒီဥယျာဉ်ဟာ ပြီးပြည့်စုံသွားတော့တယ်။ တသီးတခြား စွန်းထွက်နေတဲ့ အရာရယ်လို့ မရှိတော့ဘူး။ အခုမှ ကြည့်ရတာသဟဇာတ ကျသွားတယ်။ ဥယျာဉ်ဆိုတာ ဘဝနဲ့တူတယ်။ တစ်ပေါင်းတစ်စည်းတည်း ရှုမြင်ဖို့ လိုအပ်တယ်။ ကျွန်တော်တို့ဟာ အကယ်၍ အရာဝတ္ထုတစ်ခုပေါ်မှာသာ အသေးစိတ် တရစ်ဝဲဝဲ ကြည့်ရှုခံစားနေမယ်ဆိုရင်ြ<ွကင်းကျန်တဲ့ အရာတွေ အားလုံးဟာ အကျဉ်းတန်သွားပါလိမ့်မယ်''တဲ့။
ဒီတော့ မဖြစ်နိုင်တာတွေကိုပဲ တွေးပြီး ဒီအတွေးတွေနဲ့ အချိန်ကုန်သွားတာမျိုး၊ နောက်တစ်ခုက လိုအပ်ချက်တွေ ပြည့်စုံနေတာ တွေကို အလွန်ပဲ လိုချင်နေတာမျိုး။ နောက်တစ်ခုက အလိုမကျမှုတွေ ရှိနေရင်လည်း ဒီအပေါ်မှာပဲ စိတ်ကိုနှစ်မြှပ်ထားတာမျိုး၊ နောက် ဒီကိစ္စကြီးကို သူလုပ်နိုင်ပါလျက် မလုပ်လို့ဆက်ဖြစ်နေတာမျိုး စတာတွေနဲ့ တစ်ခုခုအပေါ်မှာ မကောင်းတဲ့စိတ်တွေနဲ့ နှလုံးသွင်းမကောင်းဘဲ ဘာမှအလိုမကျဘဲ ရှိနေရင်တော့ ပြီးပြည့်စုံတဲ့ဘဝ၊ သို့မဟုတ် သာယာမှုအပေါင်းနဲ့ ရွှင်လန်းနေရတဲ့ ဘဝမျိုးတွေဟာ အလိုလိုကုန်ဆုံးသွားနိုင်ပါတယ်။ ဒါကြောင့် မဖြစ်ပေါ်သေးရင် တစ်ဦးဦး တစ်ယောက်ယောက်ရဲ့ အကူအညီကို မျှော်ကိုးနေမယ့်အစား ကိုယ်တိုင်ပါဝင်ပြီး ဖြည့်ဆီးပေးလိုက်တာဟာ အကောင်းဆုံးအဖြေဖြစ်ပါလိမ့်မယ်။ ဒါပေမယ့် တစ်ဦးတစ်ယောက် ရဲ့ အစွန်းထွက်မှုကိုတော့ လျစ်လျူရှုထားလို့တော့ မဖြစ်ဘူးပေါ့။ သူလည်း သူလုပ်နိုင်တဲ့ သို့မဟုတ်ရင် ကိုယ်မလုပ်နိုင်တဲ့ လုပ်ငန်း ကြီးတွေမှာ သူလုပ်နေတာကိုပဲ ကျေးဇူးတင်ရမှာ ဖြစ်ပါတယ်။ ဆိုတော့ မနက်ဖြန်များစွာအတွက် ပြင်ဆင်စရာတွေကတော့ အလွန်ပဲ များပြားနေပါလိမ့်မယ်။ ဒါကို တွေးပြီး ကြောက်ရွံ့စရာမလိုပါဘူး။ နောက် မလုပ်ခင် ဖြစ်မှာမဟုတ်ဘူးဆိုတာလောက်နဲ့ ဘာမှမလုပ်ဘဲ နေတာမျိုး။ ဘယ်သူလုပ်ရမှာ၊ သူလုပ်ရင်ပြီးသွားမှာပဲဆိုပြီး စောင့်မျှော်နေတာမျိုးတွေနဲ့ အချိန်ကုန်လွန်သွားတာမျိုး တော့ မဖြစ်သင့်ဘူးလို့ ထင်ပါတယ်။ ကိုယ်တိုင်သာလျှင် ပူးပေါင်းပါဝင်လိုက်ခြင်းကသာ အကောင်းမွန်ဆုံး ရလဒ်တစ်ခု ထွက်ပေါ်လာပါလိမ့်မယ်။ ဒါမှသာလျင် လုပ်ငန်းတိုင်းဟာ ကြီးပွားတိုးတက်မှု လမ်းကြောင်းပေါ်ကနေ ညင်သာစွာကူးခတ်လျက် ကောင်းမွန်တဲ့ အကျိုးများဖြစ်ထွန်းစေပါလိမ့်မယ်။
ဒီတော့ ခေါင်းဆောင်လုပ်တဲ့သူမှာတော့ များစွာတာဝန်တွေ ရှိနေပါလိမ့်မယ်။ ဘောလုံးပွဲစကားနဲ့ ပြန်ပြောရမယ်ဆိုရင်တော့ အသင်းအုပ်ချုပ်သူ၊ နည်းပြအဖြစ် ထမ်းဆောင်နေတဲ့ မန်နေဂျာအပေါ်မှာ တာဝန်ယူတတ်ပါလိမ့်မယ်။ နည်းစနစ်တွေ မှန်ကန်ဖို့ လိုသလို၊ ကစားသမားများရဲ့ စိတ်ဓာတ်ကိုလည်း အမြင့်ဆုံးအချိန်အထိ မောင်းနှင်ပေးနိုင်ရပါမယ်။ ဒီလူနဲ့ ဒီနေရာ အံဝင်ခွင်ကျ ဖြစ်၊ မဖြစ်ဆိုတာလည်း သိရပါမယ်။ နောက်တစ်ခုက တကယ်လို့ အံဝင်မှုမရှိရင်၊ ခြေစွမ်းကျနေရင်တော့ အခြားလူတစ်ယောက်နဲ့ အစားထိုးသင့်ရင် အစားထိုးပြီး ကစားစေရပါမယ်။ ဒီလိုပါပဲ လူကြီးလုပ်သူအနေနဲ့ ကိုယ့်လက်အောက်က လူတွေကို အမြဲတန်းလိုလို လေ့လာ အကဲခတ်တတ်ရပါမယ်။ မကြာခင်ကတော့ နိုင်ငံသမ္မတကြီးအနေနဲ့ ဒီလိုမျိုးအစားထိုးပြီး ဝန်ကြီးဌာနတွေကို လူသစ်နဲ့ အစားထိုးတာတွေ လုပ်ပါတယ်။ ဒါကိုလည်း ကျေးဇူးတင်ရမှာဖြစ်ပါတယ်။ သူတို့ကိုလည်း ဆက်လက်ပြီးတော့ ကစားခိုင်းထားပြီး ခြေစွမ်းကျတာတို့၊ နောက်တစ်ခုက အံဝင်မှုမရှိတာတို့၊ နောက်တစ်ခု လူပဲလိုက်ချပြီး ပြိုင်ပွဲစည်းမျဉ်းနဲ့အညီမကစားတာတွေကို လေ့လာပြီး နောက်ပါအစားထိုးရမယ့် လူတွေကိုလည်း ထရိန်နင်ပေးထားရပါလိမ့်မယ်။ ဆိုတော့ လူတိုင်းဟာ သူနေရာနဲ့သူတော့ အသုံးကျနေတာမျိုးလေးတွေ ရှိနေတတ်ပါတယ်။ ဒီတော့ အံဝင်မှုမရှိရင်တော့ အမြဲတန်းအစားထိုးပြီး ပြောင်းလဲမှုဆိုတဲ့ ကစားကွက်၊ ကစားနည်းဗျူဟာတွေ ပြောင်းသင့်ရင် ပြောင်းပြီး ဆက်လက်ရွက်လွှင့် နိုင်ဖို့အရေးကြီးပါတယ်။
အချုပ်အနေနဲ့ ပြောရရင်တော့ မမြင်ရသေးတဲ့ မနက်ဖြန်များစွာမှာ ပြုပြင်ပြောင်းလဲစရာတွေကတော့ များစွာရှိနေပါလိမ့်မယ်။ ဒီအတွက်လည်း များစွာပဲပြင်ဆင်ထားရပါလိမ့်မယ်။ သူမရှိလို့၊ သူမလုပ်လို့ဆိုတဲ့သဘောနဲ့ အရေးအရာတိုင်းမှာ လက်ညှိုးထိုး အပြစ်တင်မှုဆိုတာတွေကို တတ်နိုင်သမျှ ရှောင်ပါ။ တကယ်လို့ ကိုယ်တိုင်လုပ်ဆောင်လို့ အဆင်ပြေမယ်ဆိုရင် ကိုယ်တိုင်ပဲ ပူးပေါင်း ပါဝင်ဆောင်ပြီး လိုအပ်နေတဲ့ ကွက်လပ်တစ်ခုကို ဖာထေးလိုက်ပါလို့ တိုက်တွန်းလိုက်ပါရစေ။
မောင်မင်းစိုး
No comments:
Post a Comment