Wednesday, October 14, 2015

လူငယ်နှင့် အာရုံ



    အသက်ရှိတဲ့သတ္တဝါတိုင်းဟာ အာရုံတစ်ခုခုပေါ်မှာ တည်မှီနေကြရပါတယ်။ အာရုံတစ်ခုခုကို အမြဲတမ်း ဆုပ်ကိုင်ထားပြီးတော့ နေထိုင်ကြရပါတယ်။ အာရုံနဲ့ကင်းကွာပြီးတော့ မနေခဲ့ကြပါဘူး။ ဆိုတော့ အာရုံဆိုတာ အကြမ်းအားဖြင့်တော့ လောကီအာရုံ (၅)ပါးပါပဲ။ အဆင်းအပေါ် တက်မက်ကြတယ်။ အသံပေါ် တက်မက်ကြတယ်။ အနံ့ပေါ် တက်မယ်ကြတယ်။ အရသာပေါ် တက်မက်ကြတယ်။ အထိအတွေ့အပေါ်မှာ တက်မက်ကြတယ်။ ဆိုတော့ ဒီအာရုံငါးပါးထဲကနေ တစ်ခုခုသောအာရုံကို အမှီပြုပြီးတော့ နေထိုင်ခဲ့ကြပါတယ်။

    ကောင်းတဲ့အာရုံအဖြစ် လှတာလေးတွေမြင်ရတော့ လှတဲ့အာရုံအပေါ် တက်မက်စွဲလန်းပြီး စိတ်ကို လွှတ်ချပစ်လိုက်ပြီးတော့ အဲဒီအာရုံနောက်ကို တစိုက်မတ်မတ် လိုက်ခဲ့ကြပါတယ်။ မရ ရအောင်ယူမယ်လို့ ဆုံးဖြတ်ချက် ချပြီးတော့ လိုချင်တဲ့အာရုံရဲ့ မာယာကျော့ကွင်းအောက် နစ်မြှပ်သွားခဲ့ရင်း ကောင်း၊ မကောင်းဆိုတာ သိပ်ပြီးတော့  တွေးတောမနေတော့ဘဲ လုပ်ဖြစ်လိုက်တတ်ကြတယ်။ ဒီတော့ မဖြစ်သင့်တာတွေလည်း တန်းစီပြီးတော့ ဖြစ်ပေါ် လာခဲ့တော့တယ်။

    ငယ်ငယ်က လူကြီးတွေ ဆုံးမတဲ့စကားတစ်ခွန်းရှိတယ်။ လှတာ မက်ရင် ညစာခက်မယ်ဆိုတဲ့စကားပါ။ နောက် ရှိသေးတယ်။ ရုပ်က စားလို့မှမရတာ ဘာဖြစ်လို့ဒီလောက် စွဲလန်းနေခဲ့ရတာလဲဆိုတဲ့ စကားလေးတွေပါ။ မှန်ပါတယ်။ ဒါပေမယ့် ပုထုဇဉ်လူသားများပီပီ အလှအပကိုတော့ မက်မောတတ်ကြပါတယ်။ လှတာလေးတွေ တွေ့ရင်လည်း လိုချင်တတ်ကြပါတယ်။ ဒါဟာ ပုထုဇဉ်မှန်ရင် ဖြစ်တတ်တဲ့သဘာဝတစ်ခုပါပဲ။ ဒါပေမယ့် စဉ်းစား ဖို့တော့ တိုက်တွန်းချင်ပါတယ်။ အကျိုးရှိ မရှိ၊ ကောင်း မကောင်းဆိုတာတွေကိုပေါ့။ အလှမက်လွန်းပြီးတော့ ဓားစာခံဖြစ်ခဲ့ရတာတွေလည်း မကြာခဏဆိုသလို ကြားနေခဲ့ရပါတယ်။ ဟိုတလောလေးက လူငယ်တစ်ယောက်နဲ့ စကားပြောဖြစ်ပါတယ်။ အဲဒါလေးကို ပြန်လည်ပြီးတော့ ပြောပြချင်ပါတယ်။

     အခုခေတ်လူငယ်တွေက သိပ်ပြီးတော့ မစဉ်းစားကြဘူးတဲ့။ ပိုဆိုးတာက မိန်းကလေးတွေပဲ။ ဘာဖြစ်လို့ လဲဆိုတော့ ကိုယ်နဲ့ဘာမှန်းမသိသေးတဲ့ ကောင်လေးတွေနဲ့ လိုင်းပေါ်မှာခင်၊ အပြင်မှာ ခဏချိန်းတွေ့၊ ဒီအထိက ပြဿနာမဟုတ်သေးဘူး။ ဓာတ်ပုံကို ပို့စ်အမျိုးမျိုးပေးပြီး တွဲရိုက်ကြတယ်။ ဓာတ်ပုံရိုက်တဲ့အထိလည်း ခွင့်လွှတ်လို့ ရပါသေးတယ်။ ဒါပေမယ့် အဲဒီပုံတွေကို လူမှုကွန်ယက် လိုနေရာမျိုးမှာ တင်ပစ်လိုက်ကြတယ်။ နောက် အကြောင်း တစ်ခုခုနဲ့ သဘောထား မတိုက်ဆိုင်တော့ အဲဒီပုံတွေက ဓားစာခံဖြစ်ပြီးတော့ နောက်ဆုံး အရှက်ခွဲခံရတဲ့အနေအထား အထိ ရောက်သွားခဲ့ရတာမျိုးတွေ မကြာခဏဆိုသလို တွေ့နေခဲ့ရတယ်တဲ့။

    ဟုတ်ပါတယ်။ သူပြောသလို ဟိုတလောလေးကပဲ မိန်းကလေးအနေနဲ့ နောက်တစ်ယောက်နဲ့တွဲတာကို သိတော့ အရင်ရည်းစားဟောင်းက ဟိုတုန်းကသူနဲ့အတူ နေခဲ့တာတွေ၊ ပုံသဏ္ဍာန်အမျိုးမျိုးတွေကို လူမှုကွန်ယက်ပေါ် တင်လိုက်ပြီးတော့ အတိတ်ကို ပြန်လည်တူးဖော်လိုက်ပါတယ်။ ဒီတော့ မဖြစ်သင့်တာတွေ ဖြစ်တော့တာပဲ။ ဒီပုိ့စ် အောက်မှာလည်း အမျိုးမျိုး ကွန်မန့်တွေ တွေ့လိုက်ရပါတယ်။ တချို့က ကလေးမလေးဘက်ကနေ မခံနိုင်လို့ ရေးကြတယ်။ တချို့ကျပြန်တော့ ဘာမှန်းမသိဘဲနဲ့ ပုံတွေကို လူမှုကွန်ယက်ပေါ်တင်ခဲ့တဲ့ ကလေးမလေးကို အပြစ် တင်ကြတယ်။ နှစ်ယောက်စလုံးကလည်း လူငယ်စိတ်နဲ့ တင်ခဲ့ကြတာဖြစ်ပါလိမ့်မယ်။ ရုပ်ရည်သန့်သန့်နဲ့ ချစ်စရာ လူငယ်လေးတွေပါ။ ဒါပေမယ့် ဘာမှမဖြစ်ခင် နောက်ဆိုဒီလိုပုံတွေကို လူမှုကွန်ယက်ပေါ် မတင်မိဖို့တော့ အထူးသတိ ထားရပါလိမ့်မယ်။ ပျော်တတ်တာ၊ ပွင့်လင်းတာ လူငယ်ဘာဝဆိုပေမယ့် အခန့်မသင့်ရင် အဲဒါတွေက ကိုယ့်ကိုယ် ပြန်လည်ပြီးတော့ ဒုက္ခပေးတတ်ပါတယ်။

    ထိုနည်းတူစွာပါ၊ အသံလေး သာယာလို့ဆိုပြီး ချစ်ခင်စွဲလန်းမှုတွေ၊ နူးညံ့တဲ့အထိအတွေ့လေးရှိလို့ဆိုပြီး တက်မက်စွဲလန်းမှုတွေစသဖြင့် အာရုံငါးပါးကတော့ မနက်မိုးလင်းကတည်းကနေ ညဘက်အိပ်တန်းဝင်ချိန်အထိဆိုသလို  ပုံစံအမျိုးမျိုးနဲ့ မြူဆွယ်နေခဲ့ပါတယ်။ ဒါကို သတိထားပြီးတော့ အသိÓာဏ်နဲ့ ထိန်းချုပ်သွားဖို့တော့ လိုအပ်ပါတယ်။ ဒီလိုမှ မဟုတ်ဘဲ စိတ်ကို လွှတ်ချလိုက်ပြီးတော့ အာရုံတွေရဲ့ ဆွဲငင်ရာ၊ ဆွဲခေါ်ရာနောက်ကို သတိမထားမိဘဲ လိုက်နေခဲ့မယ်ဆိုရင်တော့ မဖြစ်သင့်တာတွေက တန်းစီပြီးတော့ ဝင်ရောက်လာနိုင်ပါတယ်။

    ဆိုတော့ အာရုံတွေနဲ့ ကင်းကွာပြီးတော့ လူသားများရဲ့ စိတ်တွေဟာ မဖြစ်ဘူးဆိုပေမယ့် ကောင်းမွန်တဲ့ အာရုံတွေမှာ စိတ်ကိုတည်ဆောက်နိုင်အောင် ကြိုးစားဖို့ လိုအပ်ပါတယ်။ အာရုံကတော့ အထက်ကပြောခဲ့သလို ပြင်းအားကြီးတဲ့ အာရုံငါးပါးရှိသလို စိတ်ကို နူးညံအောင် သိမ်မွေ့အောင် မွန်မြတ်အောင် ဆောက်တည်ပေးနိုင်တဲ့ ကောင်းမွန်တဲ့အာရုံတွေလည်း ရှိနေခဲ့ပါတယ်။ ဒါကြောင့် ကောင်းမွန်တဲ့အာရုံပေါ်မှာ စိတ်ကိုတည်ဆောက်ပြီးတော့ ကောင်းမွန်တဲ့အာရုံလေးတွေနဲ့ နေထိုင်နိုင်ဖို့ အရေးကြီးပါတယ်။ ဒီနေရာမှာ ခုနကပြောခဲ့တဲ့ သတိတရားဟာ အရေးကြီးပါတယ်။ ဒီသတိတရားဟာ အသိနဲ့ယှဉ်ပြီးတော့ နှလုံးသွင်းကောင်းမယ်ဆိုရင်တော့ အာရုံကောင်းတွေနဲ့ ဘဝဟာ စိုပြေနေမှာဖြစ်ပါတယ်။

    ဆိုတော့ အဓိကအနေနဲ့တော့ ယောနိသော မနသိကာရဆိုတဲ့ နှလုံးသွင်းကောင်းဖို့၊ စိတ်ထားကောင်းဖို့၊ စိတ်ထားတတ်ဖို့ အရေးကြီးပါတယ်။ လူတွေသုံးနေကျစကားတစ်ခွန်းရှိပါတယ်။ ရှိတာလေးနဲ့ ရောင့်ရဲပါဆိုတဲ့စကား ပါပဲ။ ဒါကတော့ မင်္ဂလာတရားတော်က သန္တုဋ္ဌီ-ဆိုတဲ့ မင်္ဂလာတစ်ပါးပါပဲ။ ကိုယ့်မှာ မရှိဘဲနဲ့ ဟိုဟာလည်း လှလို့၊ သာယာလို့၊ မွှေးလို့၊ နူးညံ့လို့ လိုချင်လိုက်တာဆိုပြီး မဖြစ်ဖြစ်အောင်၊ မရ ရအောင် လုပ်နေရရင် စိတ်လည်း အရမ်း ပင်ပန်းလှပါတယ်။ ခက်တာက နောက်ဆုံးဒီအာရုံတွေကြောင့်ပဲ ကိုယ့်စိတ်ကို မတည်ဆောက်နိုင်ဘဲ၊ မရောင့် ရဲနိုင်ဘဲ ရရင်ပြီးရော့ပုံစံနဲ့ တရားသည်၊ မတရားသည် သိပ်ပြီးတော့ တွေးမနေဘဲ မလုပ်သင့်တာတွေ၊ မပြုသင့် တာတွေ၊ မပြောသင့်တာတွေကို လုပ်မိ၊ ပြုမိ၊ ပြောမိလိုက်ကြရင်း ကောင်းမွန်လှတဲ့ ပင်ကိုယ်စိတ်ရင်းလေးကို အာရုံတွေအတွက် ထိုးကျွေးပစ်လိုက်တတ်ကြတယ်။ ရရှိလိုက်တဲ့ အကျိုးတရားက မကောင်းမှုတွေတန်းစီနေခဲ့တော့ တာပေါ့။

    တကယ်တော့ ကောင်းသည်ဖြစ်စေ၊ မကောင်းသည်ဖြစ်စေ အဲဒီအလုပ်ကို ကိုယ်လုပ်မိမယ်ဆိုရင် အား ကောင်းတာက ကြားဖြတ်ပြီးတော့ အကျိုးပေးခွင့်ရသွားရင် အရင်အကျိုးပေးပေမယ့် အခြားတစ်ဖက်က အကျိုးက ပျောက်သွားပြီးလို့တော့ မထင်လိုက်ပါနဲ့ အမြဲတန်းပွင့်နေခဲ့ပါတယ်။ အကျိုးပေးချိန်တန်ရင် ဆက်ဆက်ကို အကျိုး ပေးပါလိမ့်မယ်။ ဒါကိုလည်း သိထားဖို့ လိုအပ်ပါတယ်။ တချို့ကထင်တယ်။ မကောင်းတာလုပ်တဲ့လူက ကြီးပွားတယ်။ ချမ်းသာတယ်။ သာလွန်တယ်။ ကောင်းတာလုပ်တဲ့ လူက ဆင်းရဲတယ်။ အောက်မှာကျန်ခဲ့တယ်ဆိုပြီးတော့ ကောင်း မကောင်းဆိုတာကို လျစ်လျူရှုပြီးတော့ မကောင်းတာလုပ်က အကျိုးပေးမြန်တယ်ဆိုပြီး မကောင်းမှုနဲ့ အသက် မွေးဝမ်းကြောင်း ပြုကြတယ်။ တကယ်တော့ မကောင်းတာလုပ်ရင် မကောင်းကျိုးဘဲ ရမှာဖြစ်ပါတယ်။ ထိုနည်းတူစွာ ပါပဲ။ ကောင်းတာလုပ်ရင်လည်း ကောင်းကျိုးကိုပဲ ရရှိမှာဖြစ်ပါတယ်။ ဒါဟာ ဘယ်တော့မှမပြောင်းလဲတဲ့ သဘာဝ အမှန်တရားပါပဲ။ ဒါကို စွဲမြဲစွာ လက်ခံထားဖို့ပါ။

    အထက်က ပြောခဲ့သလိုပေါ့။ အကျိုးပေးချိန်မတန်သေးလို့ မပေးသေးတာပါ။ ဒီအကျိုးကိုလည်း ပေးဖို့အတွက် ကိုယ်လုပ်ထားတဲ့ကံတွေက ကိုယ့်ရဲ့ပျော့ကွက်၊ ဟာကွက်ကို စောင့်နေခဲ့တယ်လို့ မှတ်သားရပါလိမ့်မယ်။ ဒါကြောင့် လူငယ်တွေအနေနဲ့ ဒီလိုမျိုး အာရုံငါးပါးရဲ့ လှည့်ဖြားမှု၊ သွေးဆောင်မှုတွေကြောင့် တစ်နေ့တစ်မျိုး မရိုးနိုင်အောင် သိမ်းသွင်းခံနေခဲ့ရပါတယ်။ ဒါကို သတိထားပြီး ကိုယ့်ကိုယ်ကို စောင့်ကြည့်ပြီးတော့ ထိန်းသိမ်းနိုင်ဖို့ လိုအပ်ပါတယ်။ တဒင်္ဂသာယာမှုတွေကိုလည်း မမေ့လိုက်ပါနဲ့။ တဒင်္ဂသာယာမှုအတွက် အညွန့်တလူလူ တက်နေမယ့် လူငယ်စိတ်တွေကို စိတ်လိုက်မာန်ပါ ထိုးမကျွေးလိုက်ပါနဲ့။ လူငယ်တွေရဲ့ အားတွေဟာ ကမ္ဘာကြီးအတွက် များစွာလိုအပ်ပါတယ်။ လိုအပ်နေတဲ့ ကမ္ဘာကြီးကို လက်ကမ်းဖို့၊ ဖားထေးဖို့၊ ပြုပြင်ဖို့၊ ထိန်းသိမ်းဖို့အတွက် ကောင်းမွန်တဲ့ အာရုံတွေကို အမှီပြုပြီးတော့ လှပတဲ့လူသားအဖြစ် ဖန်တီးနိုင်ဖို့၊ ပုံဖော်နိုင်ဖို့ မိမိတို့ရဲ့စိတ်ကလေးတွေကို မကောင်းတဲ့ အာရုံတွေရဲ့ လှည့်ဖြားမှု၊ ဆွဲဆောင်မှု၊ သိမ်းသွင်းမှုအောက်ကနေ ရုန်းထွက်နိုင်ကြပါစေကြောင်း။

မောင်မင်းစိုး
အတွဲ ၂၊ အမှတ်  ၁၅၊ ၂ဝ၁၅၊
The Myanmar Review ဂျာနယ်

No comments: