ခံစားမှု အနုပညာ(ကဗျာ ပါဖောမင့်)

အသံတွေကို စိတ်အလုပ်ဖြစ်တဲ့ နာကြားမှုနဲ့ သိမှုဆိုင်ရာတွေကို တစ်စစီဖြိုခွင်းရင်း
ကမ္ဘာကြီးရဲ့ ဆာလောင်မှုတွေကို ပြီးဆုံးစေရမယ်။
ကိုယ်ကျင့်တရားဟာ နယ်ပယ်တိုင်းအတွက် အရေးကြီးတဲ့ ပြယုဂ်ဖြစ်ပြီး စောင့်စည်းမှုမျဉ်းတွေနဲ့
ကမ္ဘာကြီးကို ကယ်တင်ဖို့လိုအပ်ပါလိမ့်မယ်။
မျောလွင့်နေတဲ့ စိတ်အရှုပ်များ ပြန့်လွင့်နေတဲ့ မသေချာမှုတွေကို တစ်ပေါင်းတစ်စီးထဲ စုစည်း သိုလှောင်ထားရင်း
တည်ငြိမ်မှုဖြစ်စဉ်ကို တပ်ဆင်လိုက်။
ဖြစ်ပျက်မှုတရားမှန်သမျှဟာ အကျိုးတရားတိုင်းရဲ့ ပင်မရေစီးဖြစ်ပြီး အကြောင်းတရားတွေရဲ့ ဇစ်မြစ်ရှာမှုနဲ့ ထုပ်ပိုးထားလိုက်
ပိုင်နိုင်စွာအသုံးချတတ်ဖို့ လာရာလမ်းကို လှမ်းမျှော်ကြည့်နိုင်ဖို့ လိုတယ်။
ကာလသုံးပါးဆိုတဲ့ ယန္တရားရဲ့ စက်ဝန်းမှာ ဖြစ်တည်မှုစိတ်အစဉ်ဟာ ရှေ့စိတ်နောက်စိတ်ဆိုတဲ့ အလုပ်ကို အကျဉ်းချုံ့ပြီး မှတ်သားလိုက်
ပိုင်းခြား စိပ်ဖြာ သိမြင်မှုနဲ့ အလုပ်စခန်းဝင်။
ဖြစ်ခြင်း ပျက်ခြင်းဟာ စစ်မှန်တဲ့ ဖြစ်စဉ်တစ်ခု ဖြစ်ရင် ပျက်မယ် ဒါဟာလှပတဲ့ သိမြင်မှု ဘာကိုမှ ဆုပ်ကိုင်မထားနဲ့ ခံစားမှုတိုင်းဟာ
ခံရသူတိုင်းအတွက် စဉ်းစားဖြေရှင်းရမယ့် နိယာမတစ်ခုဆိုတာ မမေ့နဲ့။
ပြိုကျသွားတဲ့ အသိဟောင်းတွေကို တွန်းလှန်ဖြိုခွင်း တစ်လွှာချင်းခွာထုတ် တည်ဆောက်မှုတိုင်းဟာ ပြန်လည်ပျက်စီးခြင်းရဲ့
လှပတဲ့ မရိုးနိုင်တဲ့ တေးတွား။
ဆုပ်ကိုင်ထားတဲ့ လွှဲမှားမှု သော့ချက်ကို အပြစ်တစ်ခုလို့ ရှုမြင် လောကီနယ်ပယ်မှာ ဘာကိုမှ ဆုပ်ကိုင်ထားလို့ မရဘူး။
မသေချာတဲ့ ပစ်မှတ်ကို ချိန်ရွယ်လိုက် ပစ်မှတ်တိုင်းကို ထိမှန်ချင်မှ ထိမှန်လိမ့်မယ် လွှဲချော်သွားတဲ့ ပစ်ချက်ဟာ
တစ်ခါတလေ ထိမှန်ခြင်းပဲ တန်ဖိုးကို မေ့မပစ်နဲ့ စွဲလန်းမနေနဲ့။
တစ်ထစ်ပြီးတစ်ထစ် တက်ခဲ့လိုက် လှေကားထစ်တိုင်းဟာ သူ့အနုပညာနဲ့သူ ရှင်သန်နေခဲ့တယ် တစ်လှမ်းချင်း လှမ်းလျှောက်
ဖြတ်တောက် ကျော်ဖြတ်ရမယ့် အဆင့်တွေကို ခုန်ကူးသင့်ရင် ခုန်ကူး ကျော်လွှာသင့်ရင် ကျော်လွှား ဆုံမှတ်တစ်ခုကို ချိန်ထားလိုက်။
တာဝန်တစ်ခု ပြီးဆုံးခြင်းကို သိမြင် နားသင့်ရင် နား အနားယူဖို့ လိုအပ်ပါတယ် ပါဖောမင့်တွေနဲ့ တင်ဆက်ပြသ ကမ္ဘာကို ကဗျာပြုမိုး ရွာစေ။
လက်ထဲက အရာဝတ္ထုကို အပြန်ပြန်အလှန်လှန် သုံးသပ် သင်္ကေတတိုင်းဟာ နိမိတ်ပုံတွေနဲ့ ဖွယ်ဖွယ်ရာရာ လွတ်မြောက်မှုတိုင်းဟာ
လွှတ်လို့မြောက်ခဲ့ရတာ ဒါကို ခံစားနားလည်ခြင်း သီအိုရီနဲ့ ဘ၀တစ်ခုကို ကြေးမုံမှာ တင်ကြည့် လှပခြင်းတွေ စိမ်းစိုနေလိမ့်မယ်။
ခင်းကျင်းပြသထားတဲ့ သံဝေဂအထည်တွေကို တစ်စစီခွာကြည့် တက်မက်မှု မောက်မာမှု ထောင်လွှားမှု အယူမှားမှုတွေကို မြင်အောင်ကြည့်
ကျော်ဖြတ်ခဲ့တဲ့ လမ်းကြောင်းမှာ တွေ့မြင်ခံစားခဲ့ရတဲ့ အစွယ်တွေကို ရိပ်သိမ်းပြီး ဓမ္မသံစဉ်ရဲ့ ချိုမြမှုတွေကို ငြိမ့်ညောင်းစွာ ခံစား အိပ်ပျော်နေတဲ့
အသံလှိုင်းတွေဟာ နိုးထလာလိမ့်မယ်။
ကမ္ဘာမှာ ကဗျာပြုမိုးရွာဖို့နဲ့ အရာဝတ္ထုတိုင်းရဲ့ ဖြစ်စဉ်တွေကို ရှုမြင်သုံးသပ် ဘောင်ခတ်ထားတဲ့ အသိတွေကို ရှင်းထုတ် ဆုပ်ကိုင်ထားတဲ့ တရားသေ၀ါဒကို
ဖြိုချ အရာရာဟာ သူ့အလှနဲ့သူ လှလို့ အရာရာဟာ သူအကြောင်းနဲ့သူ အမှုန်အမွှားလေးတွေလည်း ဓာတ်သဘောအရ အလုပ်ဖြစ်နေခဲ့တယ်။
မြင်အောင် ကြည့် ကြားအောင် ထောင် သိအောင်လုပ် အနံ့တွေ ရှုရှိုက် အရသာတွေ  ခံစား အတွေ့အထိကို ဖိကြည့်လိုက် အာရုံငါးပါးရဲ့ အလုပ်ဟာ
မသိစိတ်ကနေ အလုပ်လုပ်နေခဲ့တယ် မိန်းကလေးနှစ်ယောက်ရဲ့ သန်းတုပ်ခြင်းအနုပညာဟာ ၀င်းမှည့်နေတဲ့ သစ်သီးတစ်လုံးပါပဲ။
ရိုးရိုးလေးပါပဲ ထိုင်ပြီးပစ်နေတဲ့ အကုသိုလ်တွေနဲ့ ခန္ဓာတွင်းရဲ့ နာကျင်မှုတွေကို လည်ပြန်တွေးပြီး ဖြစ်ပေါ်လာတဲ့ စိတ်ခံစားမှုတိုင်းကို
လိုက်မှတ် ရှင်းထုတ် ခါထုတ် ပုတ်ထုတ် မြိုချသင့်ရင် မြိုချ ဒါဟာ စိတ်ဖြစ်စဉ်တစ်ခုရဲ့ ဝေဒနာတေးတစ်ပုဒ်။
သေရင်မပြီးသေးဘူး ဘ၀တစ်ခုရဲ့ဆုံမှတ်မှာ မျဉ်းပြိုင်သဘောတရားအရ အသွားအပြန်ရှိတယ် ရောင်စဉ်ခုနှစ်သွယ်ဘုံတန်းတွေနဲ့
လက်ခံမယ့် ဌာနတစ်ခုရဲ့ မသေချာမှုတွေရှိတယ်။
လက်ခံလိုက်ပါ နားလည်လိုက်ပါ ဖြေရှင်းလိုက်ပါ ဘာမှမသိသေးတဲ့ ပုစ္ဆာတစ်ပုဒ်အတွက် တွေးရင်း ရူးမနေနဲ့ မူးမနေနဲ့
ထူးထူးခြားခြား ပိုင်ခြားပြီး သိမြင်နားလည်လိုက်ရင် ဘာမှမဟုတ်တာကို ပိုမိုထင်လင်းလာလိမ့်မယ်။
စွန့်သင့်တဲ့အရာတွေဟာ ပင်လယ်ထဲထဲက လှိုင်းဂယက်ထက် ပြင်းထန်နေရင် ပိုပြီးအာရုံစိုက် ငြိမ့်ညောင်းမနေပေမယ့်
ဒါဟာ လောကဓံရဲ့ လှပတဲ့တရားစီရင်မှုအဖြစ် လက်ခံလိုက်။
လုပ်ဆောင်စရာတွေက လိမ်ညာမှုတွေနဲ့ ရှားပါးလှတဲ့ မျိုးစိပ်တစ်ခုလို့ သုတေသနပြု ဖယ်ရှား
လေအဟုန်မှာ နေကုန်ကူးလို့ စီမံရာအတိုင်း လှည့်လည်နေရင်း မကုန်ဆုံးနိုင်တဲ့ စာတမ်းတစ်ခုကို
ထွင်းထု သက်ပြင်းကို ရှည်လျားစွာဆွဲချ နားခိုလိုရပြီ။

မှတ်ချက်။ ။ ပဋိသမ္ဘိဒါမဂ် မြန်မာပြန်မှ ဥာဏ်စဉ်များကို အမှီသဟဲပြုကာ ကဗျာတစ်ပုဒ်အဖြစ် စိတ်အလုပ်တစ်ခုကို
ထုတ်ဆောင်ခြင်းသက်သက်။

မောင်မင်းစိုး